-IPON PALSU-

Jadi disada tikki, ro ma Oppung Mittop tu jabu naeng manogihon si Mittop…..

Oppung Mittop : "beta jo pahoppu ku, dongani jo oppung tokkin"

Si Mittop : "Tudia Oppung hudongani ?"

Oppung Mittop : "tu dokter Gigi, nga uttagon ho mandongani au daripada bapak mu, ai so diattusi bapam manang aha, sae ma holan na minum tuak i diboto Bapam, molo tuak na tabo ollak ujung ni Siborongborong on pe boi do dianggo Bapam……"

Si Mittop : "olo Oppung, beta ma Hudongani pe Oppung…."   

Lao ma halak i tu kota Siborongborong ala adong disi Dokter gigi terkenal.

Dibereng Oppung i ma pamplet di jolo ni klinik i....

Ninna Oppung ma : "bassa jo Mittop aha do tulisan ni pampplet i ?"

Dibassa si Mittop ma :  "Drg.Kopelman Jaya Pandapotan Setia Selamanya"

Oppung Mittop : "bahhh idoo, ido dokter gigi nauddenggan di Tapanuli on, Doktor Kopel"

Masuk ma nasida tubagas jala pittor disambut perawat ma :  "selamat siang, apa yang bisa kami bantu pak ?

Oppung Mittop : "Pak dope nimmu nga nasa ho balgani Pahoppu. ai marbahasa batak jo ho kale, na mantikan ho sai hira boru betawi ma ho"

Ala adong dibege dokter i marbete bete diluar pittor didapothon ma, dibereng ma namasa disi....

Drg.Kopelman : "bahhh aha namasa Oppung...huddul jo Oppung…."

Oppung Mittop : "ahhh nagutturan itoan on…"

Drg.Kopelman : "Perawat ta doi Oppung, Boru Sihite do itoan i, uhut ni i apala aha hian ma Oppung"

Oppung Mittop : "Buti do doktor Kopel, Naeng mamasang IPON Palsu au puang, boi do dison ? nga rogot rogot be ipon hu, dang boi be mangallang na marmiak neh. sadia ma sada ipon Doktor ?

Drg.Kopelman : "boi Oppung, 50 ribu sada ipon Oppung, dang pola arga i Oppung, molo di Medan nga mar 200 ra, asing dope ongkos, sasuddat ongkos ni Oppung tu Medan nga sai sada ipon dison…"

Oppung Mittop : "toe ma amang, pasang ma dua da, sada di toru sannai diginjang"

Diboan Drg.Kopelman ma Oppung Mittop tu biluk, mulai ma proses pemasangan GIGI PALSU.

Dang sadia leleng sae ma dipasang ipon palsu ni Oppung i.

Kaluar ma Oppung mandapothon si Mittop, ninna ma :
"bereng Pahoppu ku, buet ma didompet ni Oppung on hepeng 100 ribu, apala ditoruni KTP i do husolotton , bereng ma adong sallebbar disi…"

Dibereng si Mittop ma adong sallebar hepeng 100 ribu solot dibalik ni KTP,
jadi di lean ma tu Oppung.

Oppung Mittop : (dihusippon ma tu si Mittop) hepeng palsu do i amang,
nga 3 bulan i husippan, digabusi jolma Oppung di Onan namasahai.
lean ma tu dokter i si saratus ribu i, dang diboto i, molo tung pe diboto alo ma da. malo do ho mangalusi amang, bisuk do ho…"

Si Mittop : "olo Oppung……"

Lao ma si Mittop tu biluk ni Dokter Kopelman.

Ninna ma : "Bapa…..on parubat ni Oppung i, 100 ribu…."

Drg.Kopelman : "dia ma anggi, amang burju nai ho kale,  ise goar mu hasian ? (huhut ma dijalo hepeng on)

Alai toppu songgot ma Drg.Kopelman ala hepeng palsu do nadileoni si Mittop....

Ninna Ma : "bahhh anggi, dang lakku hepeng mon, hepeng palsu do on, lao ne gatti jo hepeng on tu Oppung mu, sotung hulapor ho tu Polisi…"

Dibege Oppung Mittop ma hata ni dokter i gabe mabiar ma ibana, inna rohana : "matteh ma, diboto doktor i do hape hepeng palsu i, maup ma hami"

Alai dibege ibana do dialusi si Mittop dokter i

Si Mittop : "asing Bapa on ah, ai bapa pe IPON PALSU do dipasang bapa tu Oppung ku"

Drg.Kopelma : "bahhh unang maccam maccam ho da, dang IPON PALSU i asa diboto ho, haru disikat ho pe ipon ni oppung mi sataon on dang na Luntur i,  Garansi 5 taon molo ipon ku.
age suba jo, molo Ipon Palsu luntur doi asa diboto ho"

Si Mittop : "bahhh ipe dang hepeng palsu nahulean i, loppit loppit ma, pabalik balik pe taho, manang paspasi ma, manang dege dege pe taho hepeng i molo penasaran do bapa ASLI MANANG PALSU,  molo dang MARPUTOR KASSA MATA ni amatta nadihepeng i berarti asli do i…."

Huhut pittor lao ma si Mittop, ditarik ma Oppung na huhut ninna pakkuduson  :
"hatop Oppung… beta… dijou anon Polisi….."

Pittor hatop ma halak i lao marbecca,
Alai molo si Mittop nga sai makkuturi duguldugul na…

Ninna Oppung nai Ma : "nga hudok kan Bisuk do ho pahoppu ku, malo jala bijak doho, holan Bapak mu si maup i do dang diattusi mamereng hapistaranmu"

Huhut ma dihaol Oppung on si Mittop

Ninna Oppung nai ma muse : "attong tu Onan Siborongborong  jo hita, minum seddor jo hita disi da amang, asa songon na lubbang jo....."

-----%-----%-----

http://marulaksinurat.blogspot.co.id

-OPPUNG MITTOP NENGEL-

Disada tikki, dipatupa huria HKBP ma kebaktian Tahun keluarga di Siborong borong. maccai meriah do perayaan puncak pesta tahun keluarga on.
Antusias ma akka ruas mandohoti kebaktian i apalagi muse adong do hiburan gondang dohot artis top batak.

Suang songoni do si Mittop dohot do mandongani Oppung na, ala nga matua Oppung naon ikkon ditogu togu do, tabba muse nga Nengel be Oppung ni si Mittop on.

Dung sahat di bagas ni joro pajumpang ma Oppung Mittop tu Pandita.
pittor didapothon Pandita i ma Oppung Mittop jala disalam ma tangan na huhut disukkun :  "sehat do Oppung ?"

Sai sip do Oppung on dang mangalusi, jadi ala nga nengel Oppung i pittor dihusiphon si Mittop ma tu Oppung nai maccai gogo :
"Oppung… disukkun amang Pandita sehat do Oppung ?"

Dialusi Oppung Mittop ma :
"bahhh ai ido, dang hubege be…. Sehat do inna hamu.. sehat do…"

Disukkun Pandita i ma muse :
"nga sadia tahe umur muna Oppung ?"

Pittor dihusippon si Mittop ma muse :
"Oppung… disukkun amang Paddita Sadia umur ni Oppung ?"

Dialusi Oppung Mittop ma :
"bahhh ido hape....102 Taon… ai na naeng mangalean kado do amang i, sabulan nai pe ulang tahunku amang …."

Ninna pandita i ma muse :
"bahhh tahe, pasu pasu ni Tuhan i ma ate Oppung. ai aha do Resepna Oppung maka na boi Ganjang Umur mu ?

Dihusippon si Mittop ma muse Tu Oppung nai :
"Oppung...disukkun amang Pandita ai aha do resep ni Oppung asa boi Ganjang umur ni Oppung ?"

Dialusi Oppung Mittop ma :
"ai dang adong resep na amang Pandita nami, alai huhilala ala na NENGEL i do  ra au sian doli doli makana ganjang umur hu…"

Heran ma Pandita i las disukkun ma muse :
"bahhh..... ai aha haroa hubungan ni NENGEL tu Ganjang ni umur  oppung ?

Dihusippon si Mittop i ma, lamu gogo ma suara ni si Mittop makkusiphon ala nga jut rohana sai disukkuni Pandita i torus :
"Oppung ninna Pandita i ai aha haroa hubungan na NENGEL tu Ganjang ni Umur ?

Dialusi Oppung Mittop ma :
"adong do attong da… ai dang HUBEGE BE MOLO DIJOU TUHAN i au, ai tupa pe ra sian doli doli hian pe au nungga dijou hian alai dang hea hubege, ala ni i do ra ganjang umur hu amang….."

Bobang ma Pandita i mambege, talak nama pamanganna huhut ninna roha ni Pandita i :
"molo songoni uttagon nama au marsahit NENGEL bah..."

------00------00------00------

HeHeHe....