-TOGEL-

Jadi disada tikki di Ari Minggu, naeng lao ma Bapak Mittop tu Gareja dohot si Mittop. Molo Omak Mittop nga parjolo lao dohot Nai Herpine.
Dinamardalan halaki mamolus sian Kode Nai Ramces digora Bapak Guttur ma ibana..

Bapak Guttur : "oiii lae… naeng tudia lae.."

Bapak Mittop : "tu Gareja do bah…"

Bapak Guttur : "dang buetonmu Togel on lae ?

Bapak Mittop : "ahh anon ma ida mulak Gareja.."

Bapak Guttur : "uwehhh… jam 11 do tutup sadarion togel lae, adong rajia. Molo jolo mulak gareja lae dang sanga be anon…"

Ujungna so ma tokkin Bapak Mittop, ditikkam ibana ma nomor 2537 x 10 lebbar, dung dilean Bapak Guttur Kupon nai pittor lao ma ibana tu Gareja huhut di loppit ma kupon on jala disakkui.
------------------------------------------------
Tap ma i…
Sahat ma Bapak Mittop digareja, somalna ma molo digareja godang do sibolis na manggullus mambaen akka ruas i asa modom, ima jago ni sibolis i ateh,hape molo dijabu sek balga kipas angin so boi modom, pulik ma di gareja pittor gabe modom hona ullus hosa ni sibolis.
Bapak Mittop pe songoni,lak mondohoddok.. songon naditarik hian do simalolong ni Bapak Mittop on laos tarpodom ma ibana.

Dungo ma Bapak Mittop ala adong ama dihambirang na makkutur ibana : "woi.. woi.. dungo ho lae.. durung durung.."

Dungo ma Bapak Mittop bobangon, dibereng ma nga apala dijolona pandurungon… pittor heppot ma Bapak Mittop mangaroro kattung bajuna laos dipamasuk ma durung durung na..

Dung sae parmingguan mulak ma nasida tu jabu, dang terasa nga sore be..

Masuk ma SMS, dibukka Bapak Mittop ma HP na, hape SMS sian Bapak Guttur.. “Tobbus lae 2537.. mangan mangan hita lae.. "

Pittor las ma roha ni Bapak Mittop, dibuat ma baju gareja nakkin sian gattungan di kamar, sai dicekkeri sude alai dang adong…
"Amang jo… didia kupon ku Mak”e…
oiii Mittop adong dibereng ho kupon ni bapa.. amang jo matekki… tudia ma hubaen nakkin Kupon ki ate…"

Maos ma mordong bapak Mittop on alai dang dapot na kupon nai… marsak ma ibana..

Si Mittop : "pola marsak bapa ahh… gabe marsahit bapa ala ni i.. toe ma bapa naso rejeki ni bapa ma i…"

Ido tahe.. lok ma disi “inna roha ni Bapak Mittop….
------------------------------------------------
Tap ma i…
Dapot ma muse ari minggu….
Tong do marminggo Bapak Mittop…
Tong do nga ditarik simalolong na pas naeng tikting, alai ala adong tikting parbogason jolo dipaima ibana dobe tinkting i, dung sae tikting parbogason i dilanjut porhangir ma muse manjaha hamauliateon na masuk diminggu nasalpu.

Ninna porhangir i ma : "Nijado do hamauliateon sian “NN” ala nga dipasahat kupon 2537 x 10 lebbar nadiari Minggu nasalpu jala kaluar do kupon i, gabe tabba ma uang kas ta sebesar Rp.25.000.000, mauliate ma nipasahat tu namangalehon hamauliateonnai, butima....."

Holan dibege Bapak Mittop Tikting i pittor kumat ma jantung na,
"amang jo… ai nahubaen do gabe durung durung kupon togel hi…amang jo Oppung....."

gabe sai hira na kejang kejang ma bapak Mittop sadari i, hira na solpoton ...
 ----------00-----------

pesan moral sian cerita on, molo nga adong sakkap ta naeng ibadah unang ma mampar pikkiran age tudia.
Horas ma...

Copyright 2016- Marulak Sinurat

Batak Toba, Cerita Batak, Cerita Lucu, Humor Batak