(Unang heran hamu ateh akka dongan.. dang adong istilah Bus dohot Mobil di hita an, MOTOR do na adong, dang i tahe ? jadi segala benda beroda empat MOTOR do i, jala dang adong pengucapan “trevel” untuk Travel di hita an ateh ,TRAPEL do na adong. makana molo adong manukkun : naik aha ho sian Medan ? pittor dialusi ma : mar motor trapel do… HaHaHa..tole ma hulanjut majo..)
ala lagi musim liburan do jala godang sewa ditogihon ma si Mittop asa adong dongan dongan na makkatai di dalan, sengaja do dang diisi Bapak Mittop bangku jolo asa adong inganan ni si Mittop , anak hasian na.
Mulai ma cerita on sian pool motor trapel di jalan sisingamangara Medan, satokkin dope nga gok akka penumpang…
Si Mittop : "Bapa.. apala satokkin dope nga gok sewa, berarti godang do pangomoan bapa sanggombas on"
Bapak Mittop : "ima amang , alani liburan i attong, makana hutogihon ho asa adong dongan ni bapa marnonangi.
Sukkun jo halak i akka tu dia be do sude…"
Pittor jongjong ma Si Mittop : "sattabi amang inang… piga halak tu Siborongborong ?
Pittor martudu ma 7 halak , 4 halak mandok di Balige, 3 halak di porsea…
Dietong si Mittop 7,4,3.. bah 14 dope.. sannai tudia ?
disukkun ibana ma : "jei sada nai tu dia ma on amang inang, Alana 14 dope on hape hita 15.."
Dialusi sahalak opung boru ma sian bangku tonga : "au… tu Tarutung.."
Si Mittop : "toe ma oppung, amang dohot inang, asa berangkat hita martangiang be ma hita dibagas rohatta asa selamat selamat hita.."
Oppung boru : 'uwehh tahe… tamelleng dope ho nga bijak, aut sura ma sude akka kernet di toba an songon ko ramah na nga aman be akka natua tua songon iba on… toe ma amang…"
Tap mai…. Berangkat ma motor on, huhut ma diputor si Mittop kaset batak Trio Maduma ( ingot hamu, Trio Maduma do da, unang songon donganku salah mandok gabe Trio MakDuma HeHeHe)
Dapot ma Kota Porsea… Turun ma 3 halak sewa…..
Hape pas muse ma 3 halak sewa na turun i sabangku dohot Oppung boru i…. gabe las ma roha ni oppung boru i apalagi nga ditarik matana naeng modom..
Pittor dipapeak oppung boru i ma di kursi i.
Sahat ma muse di Balige, turun ma ma 4 halak…lanjut ma muse motor on,
alai ninna si Mittop : "bapa boasa tinggal 7 halak ? sada nai didia ?
Bapak Mittop : "ah lok songoni, atik na sala turun do nakkin ibana di Porsea ?
Tap mai…sahat ma Siborongborong, turun ma 7 halak on gabe las kosong ma motor on…
Bapak Mittop : "attong na tu Tarutung nakkin do ra salah turun.."
Si Mittop : "jei boha nama i bapa ?
Bapak Mittop : "bah lok songoni, sei hadioran be i, beta ma mulak muse Tu Medan, sanga dope sa trip nai biccan godang sewa…"
Ujung na dang sahat be nasidatu tarutung, mamutor ma halak i ullak ni Siborongborong balik muse tu medan…
Hira hira ½ jom dungo ma Oppung Boru on, dibereng ma tu luar, ninna roha na : "bah.. di Siborongborong dope, dao dope tarutung, attong sanga dope modom"
Gabe modom ma muse oppung on...
Hape tikki dungo oppung i tarbereng ni si Mittop sian kacca spion ni motor i, dihusiphon tu bapa na :
"agaiabang… bapa… adong Oppung oppung di pudi ?
Bapak Mittop : "ahh ho... pabiar biarhon do…."
Dibereng bapak Mittop ma tu pudi dang adong, gabe dohot ma si Mittop heran…
Satonga jom nai, Dungo ma muse Oppung on, dibereng tu kacca, inna rohana : "sotung lewat au, alai dibereng tombak tombak dope… ahh leleng nai.. sanga dope modom….."
Lak dopapodom ma muse...
Hape tikki dungo oppung i tarbereng ni Bapak Mittop sian kacca motor i pittor puccat bohina :
"agaiabag… toho do hape nadibereng mi Mittop, nga diida bapa nakkin..."
Si Mittop : "boha nama i bapa ? gabe mabiar au Bapa, atek nai do kuntilanak na di tombak i bapa ?
Bapak Mittop : "sip ho, unang goari….. dang boi digoari si songoni amang, kan gabe ro ibana neh..."
Gabe rappak mabiar ma halak i nadua…
pittor dibalap bapak Mittop ma motor na on asa hatop sahat tu balige…dang dipedulihon be akka lubang… gas torus....
mungkin ra alani guncangan motor i, gabe dungo ma muse Oppung Boru i jala pittor Hundul, dibereng ma sian jeddela tu luar ninna roha na : "asing… lak so sahat tu tarutung.. bah.. boasa gabe tu balige musek…"
Jongjong ma oppung i naeng manukkun....
Hape di nadungo i oppung boru i tarbereng ni si Mittop muse sian kacca, dihusiphon si Mittop ma :
"bapa…. Nga dipudita kuntilanak i… amang jo bapa"
Dibereng Bapak Mittop ma : "agaiabag… mate ki jo…"
Pittor hatop ma dipaso bapak mittop motor na on pas dijoloni rumah makkan di Balige…
pittor kaluar ma halak i nadua sian motor i huhut mangangguk : "tolonggggg… Begu…. Tolong…kuntilanak di motor hu…"
Hape Si Mittop pe nga sappe kossing dicalana alani biar na..
Pitor rame ma akka jolma ro, ninna natorop i :
"didia begu amang…"
Si Mittop : "an.. indian dibangku pudi adong begu"
Hape Pittor Turun ma Oppung boru on sian motor.
sebagian dakdanak dohot ina ina na adong disi gabe lari marikkati…
Pittor muruk ma Oppung Boru : "heee… supir maup… asa godang pangomoan mu lak so ditaruhon ho au tu Tarutung,
Leak do Lak so sahat sahat au tu Tarutung hape namamutor do ho di Siborongborong… butul do supir maup ho....
Dihusiphon si Mittop ma : "bapa.. attong oppung ido naso tarida nakkin..."
-------00-------00-------00--------
copyright 2016 - Marulak Sinurat
*image from google
Tidak ada komentar:
Posting Komentar